Oksford Universitetinin professoru Erik Dreksler ARDNŞ-nin Nanotexnologiyalar Departamentində olub
Oksford Universitetinin professoru Erik Dreksler ARDNŞ-nin Nanotexnologiyalar Departamentində olub. Tanınmış amerikalı alim, Oksford Universitetinin professoru Erik Dreksler ARDNŞ-nin Nanotexnologiyalar Departamentində elmi seminarda iştirak edib. ANS PRESS ARDNŞ-ə istinadən xəbər verir ki, amerikalı alim ARDNŞ-nin neft sənayesində nanotexnologiyaların tətbiqi istiqamətində əldə etdiyi nailiyyətlərlə tanış olub.
Neft-qaz sənayesində mövcud problemlərin həlli, neftçıxarmada neftvermə əmsalının yüksəlməsi, eləcə də hasilatda, qazmada və digər sahələrdə nanotexnologiyaların tətbiqi nəticəsində alınan effektlər barədə qonağa ətraflı məlumat verilib.
Departamentin mütəxəssisləri tərəfindən işlənmiş “Kiçik təsir və kiçik həyəcan effekti” nəzəriyyəsi əsasında tətbiqin reallaşdırılması alimin diqqətini xüsusi cəlb edib.
Görüşdə maye mexanikasının mühüm probemlərindən olan üç fazalı maye axımında yeni effektlərin yaranmasına dair müzakirələr aparılıb. E.Dreksler ARDNŞ-nin nanotexnologiya sahəsində həyata keçirdiyi işləri yüksək qiymətləndirib.