.

Leyla Yunus: “Məndən sonrakı çıxışçılar məni Azərbaycanı sevməməkdə ittiham etdilər”

Novella Cəfəroğlu: “Onun öz fikri var, bizim isə öz fikrimiz”

Bu gün Avropa Şurasının Bakı nümayəndəliyində bir qrup hüquq müdafiəçisinin Avropa Şurası baş katibinin müavini Qabriela Bataina-Dragoni ilə görüşü keçirilib.
Sülh və Demokratiya İnstitutunun direktoru Leyla Yunusun “Turan”a verdiyi məlumata görə, görüşdə siyasi məhbuslar, hakimiyyətin bu məsələ üzrə xüsusi məruzəçi Kristofer Ştrasserin Azərbaycana səfərlərini qadağan etməsi məsələlərindən danışılıb.

Qabriela Bataina-Dragon

“AŞPA Monitorinq Komitəsinin məruzəçiləri Aqramunt və Qrex Bakıda tez-tez olurlar, onların Azərbaycanda vəziyyətə verdikləri qiymət obyektiv deyil və görünür, “onların məruzələri Azərbaycan Prezident Administrasiyasında yazılır”, - deyə Yunus bildirib.
Bununla əlaqədar olaraq, vətəndaş cəmiyyəti fəalları AŞPA-ya bu məruzəçilərin dəyişdirilməsi xahişi ilə müraciət yazıblar. Bu məruzəçilərin obyektiv olmaması barədə “Human Rights Watch”un bəyanatında da qeyd edilib.
Hüquq müdafiəçisi Qabriela Draqoninin diqqətini Azərbaycanın Avropa Şurası qarşısında öz öhdəliklərini faktiki olaraq yerinə yetirməməsi faktına çəkib. Yunus xatırladıb ki, tezliklə Azərbaycan AŞPA Nazirlər Kabinetində sədrlik edəcək. “21 öhdəlikdən cəmi 4-ü yerinə yetirilib, yeddisi ümumiyyətlə, qalanları isə qismən yerinə yetirilməyib. Bu vəziyyəti necə təsəvvür edirsiniz?”, - deyə Yunus soruşub.
L.Yunusun sözlərinə görə, ondan sonra çıxış edən həmkarları onun dediklərini təkzib ediblər və onu “Azərbaycanı sevməməkdə” ittiham ediblər: “Bütün bunlar mənə Prezident Administrasiyasının nümayəndəsi Əli Həsənovun ittihamlarını, habelə 1989-cu ildə Nemət Pənahlının məni eyni şeydə ittiham etməsini və qanımda Azərbaycanlı qanından başqa qan olub-olmadığını yoxlamaq üçün ekspertiza keçirilməsini tələb etməsini xatırlatdı”.
Məzəmmətlərin daha bir səbəbi Leyla Yunusun Talış Mədəniyyət Mərkəzinin həbs edilmiş lideri, “separatçı” olan Hilal Məmmədovun və İranın xeyrinə casusluqda ittiham olunan islamçıların hüquqlarını müdafiə etməsi olub.
Öz növbəsində, görüşün digər iştirakçısı, Qadın Hüquqları Komitəsinin sədri Novella Cəfəroğlu “Turan”a bildirib ki, heç də Leyla Yunusun fikrinə qarşı çıxmayıb. “Onun öz fikri var, bizim isə öz fikrimiz. Hesab edirik ki, islamçılar arasında İranla əlaqəsi olanlar da var, azad olunmalı olanlar da”, - deyə Cəfəroğlu bildirib.
Onun sözlərinə görə, “Dadaşbəylinin qrupu” siyasi məhbuslar hesab oluna bilməz və bu işə məhkəmə qaydasında baxılmalıdır.
AŞPA məruzəçisi Kristofer Ştrasserə gəlincə, Cəfəroğlu hesab edir ki, o, Bakıya gələcək və ona viza veriləcək.
“Biz onun Azərbaycana gəlməsini çox istəyirik, belə ki, hazırda Aİ siyasi məhbuslar məsələsində ikili standartlardan istifadə etmir. AŞPA-nın payız sessiyasında siyasi məhbus ifadəsinin konkret tərifi verilib, həmçinin, başqa ölkələrdə də belə məhbusların olduğu qeyd edilib.
Mən hökuməti sevməyə bilərəm, amma Azərbaycanı sevirəm, Leyla Yunus haqqında isə bunu deyə bilmərəm”, - deyə Novella Cəfəroğlu bildirib.
O, həmçinin təsdiq edib ki, görüşdə Hilal Məmmədovun məsələsi müzakirə edilib: “Leyla Yunus onun talış olduğu üçün həbs edildiyini iddia edib. Lakin bu, heç də belə deyil, biz işə bu cür yanaşmanın əleyhinəyik, amma onun dərhal azad edilməsinin tərəfdarıyıq”.