Oğulun hərəkətləri atanı özündən çıxarıb
Kürdəmir rayonunda bıçaqlanma hadisəsi baş verib. Rayon Polis Şöbəsindən Simsar.az-a verilən məlumata görə, Cəyli kənd sakini 1975-ci il təvəllüdlü Bağırov Vahid Ağamirzə oğlu 1995-ci ildə anadan olmuş oğlu Bağırlı Xalidi bıçaqlayıb. 17 yaşlı oğlan ağır vəziyyətdə xəstəxanaya yerləşdirilib. Həkimlər onun üzərində cərrahiyə əməliyyatı aparıb və yaralının həyatı üçün yaranmış təhlükə sovuşub.
Hadisəyə ailədə televizora baxmaq üçün yaranmış mübahisə səbəb olub. Belə ki, V.Bağırovun oğlu atasının əlindən televizor pultunu alıb və başqa kanala baxmaq istədiyini deyib. Oğulun bu hərəkəti atanı özündən çıxarıb və o, bıçağa əl atıb.
Verilən məlumata görə, V.Bağırov hər hansı xəstəxanada qeydiyyatda olmasa da, əsəb xəstəliyindən müalicə olunur.