Abdurrahman Oğuzhan çəki azaltmaq məqsədilə Ramazan ayında oruc tutanları tənqid edib
Erciyes Üniversitetinin Tibb Fakültəsi Kardioloji bölməsinin professoru Abdurrahman Oğuzhan çəki azaltmaq məqsədilə Ramazan ayında oruc tutanları tənqid edib: “Ramazan ayı arıqlamaq ayı deyil” deyən həkim qeyd edib ki, arıqlamaq 10-15 gün müşahidə olunur: “Az qida qəbul olunur və arıqlama olur. Sonradan qida qəbulu artan kimi sürətli kökəlmə prosesi gedir. Orqanizm ilk günlər az yemək qəbuluna öyrəşir. Sanki həmişə az qida gələcək. Amma qidanın dozasını artıran kimi əvvəlkindən daha kök oluruq”.
Professor bildirib ki, ac və susuz qalmaq ürəyə və qan dövranına mənfi təsir göstərməsə də, iftar vaxtı bol yemək yemək zərərlidir: “Bu zaman damarlardakı qanın mədəyə hücumu başlayır. Nə qədər çox yesək, mədəyə qan hücumu o qədər də artar. Bədəni aclığa və toxluğa tədricən öyrətmək lazımdı”.