Sakinlər zorla evlərindən çıxarılıb
Paytaxtda, Şəmsi Bədəlbəyli küçəsi, 20-də söküntü işləri ilə bağlı çəkiliş aparan fotojurnalistlər fiziki təzyiqə məruz qalıblar.
“Turan” agentliyinin məlumatına görə, söküntü işlərini aparmağa gələn şəxslərlə sakinlər arasında qarşıdurma yaranıb. Qarşıdurmanı çəkən “Turan”ın fotomüxbiri Etimad Budaqov və “Azadlıq” radiosunun xanım əməkdaşı Bakı Şəhər İcra Hakimiyyəti katibliyinin rəisi Zülfəli İsmayılovun, onun ətrafında olan 20-yə qədər fəhlənin fiziki zorakılığına məruz qalıb. Etimad Budaqovun fotoaparatı sındırılıb.
Qarşıdurmada sakin Afaq İsmayılovanın səhhəti pisləşib, hadisə yerinə təcili yardım çağırılıb.
Artıq iki ildir Bakının Füzuli və Səmsi Bədəlbəyli küçələrində söküntü işləri gedir. Hökumət burada “Qış bulvarı”nın salındığını bildirir. Sakinlər söküntüləri qanunsuz, onlara verilən kompensasiyaları ədalətsiz sayaraq müqavimət göstərirlər. Rəsmi qurumlar zor tətbiq etməklə adamları evindən çıxarır. Hazırda bu məsələ ilə bağlı 300-ə yaxın sakinin şikayət ərizəsi Avropa İnsan Hüquqları Məhkəməsindədir.