Qəzeti Media Hüququ İnstitutunun hüquqşünasları müdafiə edir
KİV-in İnkişafına Dövlət Dəstəyi Fondunun icraçı direktoru Vüqar Səfərlinin “Xural” qəzetinə qarşı iddiası üzrə Azərbaycan məhkəmələrinin çıxardığı qərarlardan Avropa İnsan Hüquqları Məhkəməsinə şikayət göndərilib. Məlumat Simsar.az saytına Media Hüququ İnstitutundan verilib. Qəzetin hüquqlarını bu institutun vəkil və hüquqçuları müdafiə edir.
Vüqar Səfərli “Xural”ı 2010-cu ildə məhkəməyə verib. O, qəzetdə özü barəsində yazılmış ifadələrdən şikayətçi olub, məhkəmə iddiasında qəzetin üzr istəməsini, təkzib verməsini, mənəvi zərərə görə, 10 min manat təzminat ödəməsini tələb edib.
İddiaya baxan Nərimanov Rayon Məhkəməsi qəzetin 500 manat cərimələnməsi, Vüqar Səfərli haqqında yazılan ifadələrə görə ondan üzr istənməsi haqda qərar çıxarıb. Qərarla razılaşmayan iddiaçının şikayətinə apellyasiya instansiyasında baxılıb, cərimənin məbləği 5000 manata qaldırılıb. Apellyasiya instansiyası, daha sonra Ali Məhkəmə “Xural”ın şikayətlərini rədd edib.
2011-ci ilin oktyabrında Əvəz Zeynallı saxlanılıb. Onun barəsində həbs-qətimkan tədbiri seçilib. Baş redaktor haqqında Cinayət Məcəlləsinin 311.3.3 (külli miqdarda rüşvət alma) və 311.3.4-cü (hədə-qorxu tətbiq olunmaqla rüşvət alma) maddələri ilə cinayət işi başlanıb.
2002-ci ildə yaradılan “Xural” qəzeti 2011-ci ilin oktyabrından nəşrini dayandırıb.
RAMİL