Faytonlardan ibarət karvan od gətirmək üçün Suraxanı rayonunda yerləşən “Atəşgah” məbədinə yola düşəcək
Gələn həftə qeyd edəcəyimiz Novruz çərşənbələrinin sonuncusu – Torpaq çərşənbəsi münasibətilə paytaxt Bakıda böyük bayram şənlikləri təşkil olunacaq.
Bakı Şəhər İcra Hakimiyyətinin Mədəniyyət və Turizm İdarəsinin mətbuat xidmətinin rəhbəri Samid Rzayevin Simsar.az-a verdiyi xəbərə görə, İlaxır çərşənbədə bayram şənlikləri hər il olduğu kimi, təxminən saat 12:00-da “Azneft” meydanından başlanacaq.
Belə ki, buradan faytonlardan ibarət karvan od gətirmək üçün Suraxanı rayonunda yerləşən “Atəşgah” məbədinə yola düşəcək. Məbəddən od götürüldükdən sonra burada kiçik bayram konserti təşkil olunacaq.
Daha sonra karvan odla birlikdə Qoşa Qala Qapısına yola düşəcək və təxminən saat 19:00-da burada böyük bayram şənliyi keçiriləcək. Şənlikdə çoxlu sayda paytaxt sakininin və əcnəbi qonaqların iştirakı gözlənilir.