Jurnalistlər xəsarət alıblar
Reportyorların Azadlıq və Təhlükəsizlik İnstitutu (RATİ) martın 1-də Qubada baş verənlər zamanı jurnalistlərin fiziki təzyiqə məruz qalmasından narahatlığını bildirib və bunu həyata keçirənləri qınayıb. Qurumun bəyanatında deyilir: “Yaranan qarşıdurma zamanı “Obyektiv TV”nin jurnalist-operatoru Rəşad Vaqifoğlu başından yaralanıb. RATİ-nin əməkdaşı İdrak Abbasov qolundan xəsarət alıb. “Azadliq” radiosunun əməkdaşları Cavanşir Ağamalıyev, Abbas Atilay, “Turan” informasiya agentliyinin müxbirləri Tapdıq Fərhadoğlu, Fərid Qəhrəmanov və “Yeni Müsavat” qəzetinin reportyoru Fərahim İlqaroğlu gözyaşardıcı qazdan zəhərlənməyə məruz qalıblar.
Jurnalistlərin fiziki təzyiqə məruz qalması onların peşə borcunu yerinə yetirməsinin qarşısının alınmasına cəhddir. RATİ hakimiyyətdən jurnalistlərin təhlükəsizliyinə təminat verilməsini və bu kimi halların bir daha təkrarlanmaması üçün ciddi tədbirlər görülməsini tələb edir”.