Tədbirdə erməni vəhşiliklərindən bəhs edən videogörüntü və filmlər nümayiş olunub
Qaradəniz Texniki Universitetində baş tutan konfransda çox sayda azərbaycanlı tələbələrlə yanaşı, Türkiyədən və başqa ölkələrdən olan tələbələr, universitetin müəllimləri iştirak edib.
“Dünyada mənim Vətənim” layihəsi çərçivəsində baş tutan konfransı Qaradəniz Texniki Universitetinin tələbəsi, MİRAS Mədəni İrsin Öyrənilməsinə Kömək İctimai birliyinin üzvü Turac İsrafilov açıb.
Təşkilatdan Simsar.az-a daxil olan məlumata görə, çıxışlardan öncə şəhidlərin xatirəsi bir dəqiqəlik sükutla yad edilib. Türkiyə və Azərbaycanın dövlət himnləri səslənib.
Universitetin tələbəsi, MİRAS Mədəni İrsin Öyrənilməsinə Kömək İctimai birliyinin Trabzon təmsilçisi Nahid İsrafilzadə çıxış edərək ermənilərin 1905-1906-cı ildən Azərbaycan torpaqlarında başlayan qanlı əməllərinin mütəmadi davam etdiyini, çar Rusiyası, Sovet İttifaqı və müstəqillik illərində müxtəlif yollarla işğal niyyətlərini gerçəkləşdirdiklərini, Xocalıda yüzlərlə insanı məhz etnik mənsubiyyətinə görə qətlə yetirdiklərini konfrans iştirakçılarına xatırladıb.
Universitetin müəllimi, Prof. Dr. Mehmet Okur ermənilərin Azərbaycan və Türkiyədə həyata keçirdikləri soyqırım hadisələrinin unudulmadığından və erməni yalanlarına, erməni saxtakarlığına rəğmən sənədlərdə və yaddaşlarda hifz olunduğundan bəhs edib.
Konfrans Xocalı soyqırımı, Qarabağ müharibəsi, erməni vəhşiliklərindən bəhs edən videogörüntü və filmlərlə davam edib.