Neft məhsulları daşıyan yük qatarı Hacıqabulda qəzaya uğrayıb
Bakıdan Gürcüstana neft məhsulları daşıyan yük qatarı Hacıqabul rayonu ərazisində qəzaya uğrayıb.
«Azərbaycan Dəmir Yolları» QSC-nin Yükdaşıma Departamentinin rəis əvəzi Əşrəf Məmmədəliyev Simsar.az-a açıqlamasında bildirib ki, gecə saatlarında baş verən hadisə nəticəsində qatarın 57 vaqonundan 6-sı relsdən çıxıb. Bu vaqonlardan 3-ü aşıb.
Qeyd edək ki, Bakıdan Gürcüstana hərəkət edən bu qatar yanacaq – qazoyl daşıyırmış.
QSC-nin mətbuat xidmətinin rəisi Nadir Əzməmmədov «APA-ECONOMICS»ə bildirib ki, hadisə baş verən qatarın daşıdığı yük Qazaxıstana məxsus olub və Bakı-Batumi marşrutu ilə hərəkət edib. Vaqonlar hermetik olduğuna görə, aşma nəticəsində ətrafa neft məhsulu dağılmayıb. «Həmin vaqonlar artıq qaldırılıb. Hadisə nəticəsində xəsarət alan olmayıb», - deyə şirkət rəsmisi vurğulayıb.