Narkotik vasitə Astara rayon sakininə məxsus avtomobildən tapılıb
Polis Astara rayon sakinindən külli miqdarda narkotik vasitə tapıb. Simsar.az-ın Daxili İşlər Nazirliyinin mətbuat xidmətinə istinadən verdiyi məlumata görə, narkotik vasitə DİN Baş Narkotiklərlə Mübarizə İdarəsinin Cənub bölgəsində Regional Şöbəsi və Biləsuvar RPŞ əməkdaşlarının həyata keçirdikləri birgə əməliyyat-axtarış tədbirləri nəticəsində aşkarlanıb. Belə ki, Astara rayon sakini Elman Qurbanova məxsus “VAZ-2106” markalı avtomaşına baxış zamanı oradan 5 kiloqram 159 qram heroin, 1 kiloqram 825 qram həşiş və 924 qram tiryək aşkar edilib.
Qeyd edək ki, faktla bağlı araşdırma aparılır.