Saziş "Cənub Axını" qaz boru kəmərinin Türkiyə sularından çəkilməsinə imkan verdi
Rusiyaya Ukraynadan yan keçərək Avropaya təbii qaz nəql etməyə imkan verən "Cənub Axını" təbii qaz boru kəməri layihəsində əhəmiyyətli addım atılıb. Moskvada adıçəkilən qaz boru kəmərinin Qara dənizin altından və Türkiyə sularından keçməsinə imkan verən saziş imazalanıb. İmzalama mərasimində Türkiyənin Enerji və Təbii Sərvətlər naziri Taner Yıldız, Rusiyanın baş naziri Vladimir Putin və onun köməkçisi İqor Seçin iştirak ediblər. Sazişi Türkiyə tərəfindən "Botaş" şirkətinin baş direktoru Fazıl Şenel, Rusiya tərəfindən isə "Qazprom" şirkətinin rəhbəri Aleksey Miller imzalayıb.
Vladimir Putin imzalama mərasimindən əvvəl Türkiyənin Enerji və Təbii Sərvətlər naziri Taner Yıldızla görüşündə Türkiyə ilə 2025-ci ilədək təbii qaz paylaşdırılması məsələsində razılığa gəldiklərini bildirib. Putin "Cənub Axını" layihəsinin inşası üçün nəhayət "Qazprom"a icazə verən Türkiyə hökumətinə öz təşəkkürünü bildirib. 'Bu, şübhəsiz ki, bir ümumavropa layihəsidir. Avropa Komissiyasının dəstəyinə görə də minnətdarıq. Avropa Birliyinin "Cənub Axını" da daxil olmaqla, bir sıra infrastruktur layihələrini dəstəklədiyini hamımız bilirik." - Vladimir Putin belə deyib.