Məleykə Abbaszadə magistr olmaq istəyənlərin taleyinə aydınlıq gətirdi
Tələbə Qəbulu üzrə Dövlət Komissiyasının (TQDK) sədri Məleykə Abbaszadə magistraturada oxumaq istəyən oğlanlara möhlət hüququnun verilməməsi məsələsinə münasibət bildirib.
TQDK sədri Trend-ə müsahibəsində bildirib ki, elmlə məşğul olmaq üçün tələbə mütləq bakalavr pilləsindən sonra magistraturanı bitirməlidir.
O hesab edir ki, oğlan bakalavrlar həqiqi hərbi xidməti başa vurduqdan sonra da elmlə məşğul ola bilərlər. Onlar magistraturaya qəbul olunduqdan sonra hərbi xidmətə gedirlər, qayıtdıqdan sonra isə magistraturada oxuyurlar.
Abbaszadə həmin plan yerinin magistraturaya qəbul olunan, amma hərbi xidmətə gedən oğlan bakalavrlar üçün saxlanıldığını deyib.
Komissiya sədri bildirib ki, amma çox zaman oğlan bakalavrlar hərbi xidmətdən qayıtdıqdan sonra magistraturanın qiyabi şöbəsində təhsil almağa üstünlük verirlər.
"Kifayət qədər oğlan bakalavrlar var ki, magistraturaya hərbi xidmətdən sonra qəbul olurlar. Amma bizim gənclər bakalavr pilləsini bitirəndən, hərbi xidmətdən qayıtdıqdan sonra çalışırlar ki, işə daha tez düzəlsinlər. Belə bakalavrların arasında çox istedadlı olanları var ki, onlar elmlə məşğul olsalar, müəyyən nailiyyətlər əldə edə bilərlər", - Abbaszadə bildirib.
TQDK sədrinin sözlərinə görə, magistraturada oxumaq bakalavrların yalnız elmlə məşğul olmaq istəyi ilə əlaqədar olmur. Çox zaman magistraturada oxuyanların məqsədi ali məktəbdə müəllim kimi fəaliyyət göstərə bilmək olur.
"Çox zaman magistraturada oxuyanların məqsədi bu olur ki, bu təhsillərini başa vurduqdan sonra məktəbdə müəllim kimi fəaliyyət göstərsinlər. Buna görə də magistraturaya sənəd verirlər. Bu yolu seçən oğlanlar hərbi qulluqdan sonra da magistraturada oxuya bilərlər", - Abbaszadə əlavə edib.
Azərbaycanda "Hərbi vəzifə və hərbi xidmət haqqında" yeni qanun layihəsində magistrlara həqiqi hərbi xidmətdən möhlət hüququnun verilməsi nəzərdə tutulmur. Qanun layihəsi Parlamentin müvafiq komitəsində müzakirə edilərək, Milli Məclisin Plenar iclasında müzakirəyə təqdim olunub.
_thumb.jpg)
Leysan olacaq, dolu yağacaq
Aybəniz Haşımovanın tələbələri xarici tamaşaçıları heyrətləndirib - VİDEO
Mahsun Kırmızıgül Bakıya gəlir
Narkotik vasitələrin qanunsuz dövriyyəsi ilə məşğul olan şəxslər saxlanılıblar 
.jpg)
