Böyük sənətkarın 190 yaşı olur
Heydər Əliyev Sarayında dekabrın 14-də Mədəniyyət və Turizm Nazirliyinin və Azərbaycan Aşıqlar Birliyinin (AAB) birgə təşkilatçılığı ilə Aşıq Ələsgərin 190 illik yubileyi qeyd olunacaq.
AAB-nin mətbuat xidmətindən verilən məlumata görə, 2011-ci ilin “Aşıq Ələsgər ili” elan olunması ilə bağlı ilboyu böyük sənətkara həsr olunmuş silsilə tədbirlər həyata keçirilib, ustadın yubileyi ayrı-ayrı rayonlarda da yüksək səviyyədə qeyd olunub.
Bildirilib ki, Heydər Əliyev Sarayında təşkil ediləcək möhtəşəm yubiley tədbirində Azərbaycanın müxtəlif bölgələrini təmsil edən aşıqlarla yanaşı, qardaş Türkiyədən, İrandan və Gürcüstandan dəvət olunmuş aşıqlar da iştirak edəcəklər.