ADNA-nın prorektoru: “Onun vəzifəsindən azad olunmasında heç bir siyasi məqsəd güdülməyib”
“Rafiq Əliyev istehsalat proseslərinin avtomatlaşdırılması fakültəsinin dekanı Ramiz Allahverdiyevin təqdimatı ilə işdən azad olunub. Dekanın təqdimatında göstərilir ki, Rafiq müəllim son vaxtlar uzunmüddətli xidməti ezamiyyətlərə gedir, ona görə də kafedranın idarə olunmasında müəyyən problemlər yaranıb. Hətta bu yaxınlarda kafedranın bir dosentinə əmək intizamının pozulmasına görə töhmət də verilib. Dekanın təqdimatında qeyd olunub ki, Rafiq Əliyev kafedrada qeyri-işgüzar şərait yaradıb”.
Bunu Azərbaycan Dövlət Neft Akademiyasının tərbiyəvi işlər üzrə prorektoru Qasım Məmmədov «Media forum» saytına müsahibəsində bildirib.
Q.Məmmədova görə, R.Əliyevin kafedra müdiri vəzifəsindən azad olunmasında heç bir siyasi məqsəd güdülməyib, onun ictimai-siyasi mövqeyi bu məsələdə heç bir rol oynamayıb. Rafiq Əliyevin işdən azad olunması qanun çərçivəsində atılmış addımdır.
“Rafiq Əliyevin kafedra müdiri vəzifəsindən azad olunmasını Neft Akademiyası üçün itki hesab edirsinizmi” sualına cavab olaraq Q.Məmmədov deyib ki, Rafiq müəllim özü professor kimi maaşın kafedra müdirinin məvacibindən yüksək olduğunu vurğulayaraq kafedra müdiri olduğuna görə maaşından müəyyən qədər itirməsindən şikayətlənib.
RAMİL