"Televiziya Akademiyasının yaradılmasına çox böyük ehtiyac var"
“Hazırda telekanalların problemlərinin böyük əksəriyyəti kadrlarda bağlıdır. Televiziya və radio yayımında çalışanların çoxu zəruri ixtisas üzrə təhsil almayanlardır. Ona görə də, televiziya akademiyasının yaradılmasının çox böyük ehtiyac var. Çünki televiziya və radio yayımı çox sürtələ inkişaf edən sahədir və bu sahədə kadrların yaranması çox ciddi məsələdir”. Bunu Lent.az-a açıqlamasında Milli Televiziya və Radio Şurasının sədri Nuşirəvan Məhərrəmli deyib.
N.Məhərrəmlinin sözlərinə görə, televiziya və radio sahəsindəki problemlər tək sırf jurnalist fəaliyyəti ilə bağlı deyil: “Eyni zamanda texniki heyətin də hazırlanmasından söhbət gedə bilər. Bu gün ayrı-ayrı dövlət qurumlarının nəzdində bu cür akademiyalar fəaliyyət göstərilir. Onun üçün hesab edirəm ki, bu zəruridir. Amma bu nə zaman yaradılacaq, o haqda bir şey deyə bilmərəm”.