Kameralar yandırılıb
Simsar.az-ın “Milliyet” qəzetinə istinadən verdiyi məlumata görə, oktyabrın 25-də saat 17:55 radələrində Vanda 4,5 bal gücündə növbəti təkanın baş verməsindən sonra Van şəhərində “M” tipli qapalı həbsxanada məhbuslar kameraları yandıraraq qiyama başlayıblar.
Təhlükəsizlik qüvvələri həbsxanadan qaçışın qarşısını almaq üçün təhlükəsizlik tədbirlərini gücləndirib, xilasedicilər isə yanğını söndürməyə başlayıblar. Eyni zamanda məhbuslarla danışıqlar da başlayıb. Məhkumlar zəlzələ təhlükəsi ilə bağlı başqa rayonlardakı həbsxanalara köçürülmələrini istəyiblər. Zəlzələ bölgəsində olan DTP deputatları da həbsxanaya gəlib. Məhbuslara istəklərinin yerinə yetiriləcəyi vəd olunub və saat 20:00 radələrində əlavə addım atılmasına ehtiyac qalmadan qiyam başa çatıb. Həbsxanada yanğın da qısa müddətdə söndürülüb.