Şimon Peres Gilad Şalitin mətanətini alqışlayıb
İsrail prezidenti Şimon Peres 5 il HƏMAS tərəfindən əsir saxlanılan və bu yaxınlarda azad edilən hərbçi Gilad Şalitə baş çəkib. Şalit ailəsinin Mitzpe Hila kəndindəki evinə gələn prezident, gənc hərbçini bu illər ərzində "inanılmaz mətanət»"göstərdiyinə görə alqışladığını deyib. Gilad Şalit isə İsrail hökumətinin ona və ailəsinə göstərdiyi dəstəyə görə minnətdar olduğunu bildirib.
Gilad Şalit azadlığa çıxdıqdan sonra ilk günlərini ailəsi və dostlarının əhatəsində, evi ətrafında velosipedlə gəzintiyə çıxaraq keçirib. Əsirlikdə olarkən ölkəsində milli qəhrəmana çevrilən bu gənc hərbçini görmək üçün İsrailin dörd-bir yanından kiçik Mitzpe Hila kəndinə gələnlər də az deyil. Lakin İsrail vətəndaşlarının bir hissəsi hökumətin Gilad Şalitin azad edilməsi üçün atdığı addımı tənqid edir. Onlar Şalitin qarşılığında İsrail vətəndaşlarına qarşı terror aktları törətmiş 1027 fələstinli məhbusun azad edilməsinə qarşı çıxırlar.