"Dini rəhbərlər əhalini hazırlamalıdılar"
ATƏT-in Minsk qrupunun həmsədrləri bəyanat yayıb. AzərTAc-ın məlumatına görə, bəyanatda bildirilir ki, həmsədrlər İqor Popov (Rusiya), Bernar Fasye (Fransa), Robert Bradtke (ABŞ) və ATƏT-in fəaliyyətdə olan sədrinin şəxsi nümayəndəsi Anjey Kasprşik oktyabrın 21-dən 24-dək Yerevan, Dağlıq Qarabağ və Bakıda səfərdə olub, prezidentlər İlham Əliyev və Serj Sərkisyanla, eləcə də Dağlıq Qarabağ rejiminin rəhbərliyi ilə görüşüblər.
Qeyd edilir ki, həmsədrlər Dağlıq Qarabağ münaqişəsi ilə bağlı müxtəlif sahələrdə etimadın möhkəmləndirilməsi üzrə tədbirlərə dair bir sıra təkliflər irəli sürüblər: “Tərəflər təmas xətti boyunca insidentlərin araşdırılmasına dair prezidentlər İlham Əliyev, Serj Sərkisyan və Dmitri Medvedyevin martda Soçidəki bəyanatında razılıq bildirdiyi və apreldə həmsədrlərin təklif etdiyi mexanizm layihəsi barədə prinsip etibarilə razılığa gəliblər. Həmsədrlər həmçinin hər iki ölkənin dini rəhbərləri ilə ayrı-ayrılıqda görüşərək əhalini münaqişənin sülh, ədalətli və davamlı nizamlanmasına hazırlamağın zəruriliyini müzakirə ediblər”.
Bəyanatda bildirilir ki, həmsədrlər noyabrın sonunda regiona növbəti dəfə səfər edəcəklər.