“Azərbaycan Qafqaz bölgəsində Qazaxıstanın başlıca iqtisadi və strateji tərəfdaşıdır”.
APA-nın “Kazinform”a istinadən verdiyi məlumata görə, bunu Qazaxıstan prezidenti Nursultan Nazarbayev Almatıda Azərbaycan prezidenti İlham Əliyevlə görüşdən sonra deyib. O bildirib ki, Azərbaycan öz müstəqilliyinin 20 illiyini nəhəng siyasi və iqtisadi uğurlarla qarşılayıb: “Mən hesab edirəm ki, ölkələrimiz müstəqilliyin əldə edilməsi dövrünü layiqli şəkildə keçirdi. Bu illər bizdən öncəki nəsillərin müstəqillik arzularının gerçək olduğu illərdir”.
Dövlət başçıları Qazaxıstanla Azərbaycanın dost və qardaş ölkə olduğunu vurğulayıblar. Qarşılıqlı ticarət əlaqələrinə toxunan prezidentlər qeyd ediblər ki, ticarət dövriyyəsinin 60% artmasına baxmayaraq, mövcud ticarət həcmi onları qane etmir. Nəqliyyat, kənd təsərrüfatı və qarşılıqlı ticarət sahəsindəki layihələr gələcəkdə ticarət həcminin artmasına şərait yaradacaq.