"Tək PKK-ya qarşı yox, onun havadarlarına qarşı da savaşacağıq"
Türkiyə baş naziri Rəcəb Tayyib Ərdoğan ölkəsinin təkcə PKK terrorçularına qarşı deyil, onların havadarlarına qarşı da mübarizəni sərtləşdirəcəyini deyib.
ANS PRESS Türkiyə mətbuatına istinadən bildirir ki, "Hakkari"nin Çukurca qəzasında bu gecə 26 türk hərbçisinin şəhid olması ilə bağlı açıqlama verən Ərdoğan deyib: "Yalnız dağdakı quldur təşkilata qarşı deyil, o quldur təşkilata sifariş verən, onu sanki bir kukla kimi, bir vasitəçi kimi, satın alma və ya icarə yolu ilə istifadə edən düşmənlərə qarşı da amansız bir mübarizə aparamağa davam edəcəyik".
Baş nazir deyib: "Türkiyənin düşmənləri bunu çox yaxşı bilməlidirlər: Türkiyə, Sarıqamış, Çanaqqala və Qurtuluş savaşı başda olmaqla şəhidlərimizin əziz ruhları üzərində inşa edilmiş bir ölkədir. Bu torpaqların hər qarışı şəhid qanı ilə suvarılıb, bu torpaqlar bu şəkildə bizə vətən olub; bayrağımız rəngini şəhidlərimizin al qanından alıb. Vətən da, bayraq da bizim üçün namusdur, şərəfdir; uğrunda hər bir vətən övladının can verəcəyi qədər müqəddəsdir və mübarəkdir".