Dünyanın ən iri internet şirkəti “Google”-nin bu ilin üçüncü rübündə xalis gəliri ötən ilin analoji dövrü ilə müqayisədə 25,8 faiz artaraq 2,73 milyard dollara çatıb.
Simsar.az-ın Rabitə və İnformasiya Texnologiyaları Nazirliyinin rəsmi saytına istinadən verdiyi məlumata görə, adi səhm hesablamasında mənfəət 8,33 dollara bərabər olub.
“Google” şirkəti rüblük əməliyyat mənfəətini 3,06 milyard dollar məbləğində qiymətləndirib. Hesabat dövrü ərzində internet-şirkətin mədaxili 2010-cu ilin üçüncü rübünün 7,29 milyard dollarlıq göstəricisi ilə müqayisədə 33 faiz artıb və 9,72 milyard dollar təşkil edib.
Ötən rüb ərzində “Google”-nin göstəriciləri bazar ekspertlərinin ümidlərini doğruldub. Maliyyə hesabatı açıqlanandan sonra şirkətin səhmləri NASDAQ birjasında artmağa başlayıb.