Həmidə Ömərova beynəlxalq "Fəcr" kinofestivalına dəvət alıb
Professional Kinoaktyorlar Gildiyasının sədri, xalq artisti Həmidə Ömərova İranın Beynəlxalq “Fəcr” kinofestivalına dəvət alıb. Gildiyanın mətbuat katibi Sədaqət Kamalın ANS PRESS-ə verdiyi məlumata görə, dəvət respublikamızda keçirilən İran mədəniyyəti günlərində ölkəmizdə səfərdə olan İran rəsmisi Agayi Cavad Şəməkdari tərəfindən edilib.
Gözəl aktrisamızın İranın mötəbər kinofestivalina dəvət edilməsinə "Həzrəti Yusif" filmi səbəb olub.
Aktrisamızın Azərbaycan dilində səsləndirdiyi Züleyxa obrazı dünyanın bir çox ölkələrində müvəfəqiyyətlə nümayis etdirilən "Həzrəti Yusif" filminin Azərbaycanda xüsusilə sevilməsində rolu böyük olub.
Qeyd edək ki, Beynəlxalq “Fəcr” Film Festivalı hər il Tehranda düzənlənir. Ötən ilin 5-15 fevral tarixlərində kinofestivalın 29-cu sayı keçirilib. Festivala 35 əcnəbi film qatılmışdı.