Məşhur insana "Şərəf" verildi
Festivalın açılış mərasimində türk dünyasında yeganə “Oskar” mükafatı laureatı olan xalq yazıçısı Rüstəm İbrahimbəyova “Şərəf mükafatı” verilib. Lent.az-ın məlumatına görə, Antalya bələdiyyəsi və Antalya Mədəniyyət-Sənət Vəqfinin (AKSAV) birgə təşkil etdiyi festivalda mükafata layiq görülənlər arasında Türkiyənin kino ulduzları Tuncel Kurtiz, Halit Akçatepe, Engin Çağlar və Məhmət Dinlər də var.
Festival çərçivəsində ilk dəfə Azərbaycanın Mədəniyyət və Turizm Nazirliyinin TÜRKSOY-dakı təmsilçiliyinin dəstəyi ilə “Avrasiya kinosu – Azərbaycan” bölməsində mətbuat konfransı, rejissor və aktyorlarla görüş, kinematoqrafçılarımızın əsərlərinin nümayişi olacaq.
Atatürk Mədəniyyət Mərkəzində Oleq Səfərəliyevin “Əlvida, cənub şəhəri” filmi ilə başlayan bu bölmədə Samir Kərimoğlunun “Niyyət”, Yavər Rzayevin “İlahi məxluq”, İlqar Nicatın “Buta” və İlqar Safatın “Sahə” filmləri kino həvəskarlarına təqdim ediləcək.