Azərbaycan Balakən rayonuna yağan leysan yağışları nəticəsində 800-ə yaxın evin həyətyanı sahəsini sel suları basıb
Son iki gündə respublikanın şimal-qərb bölgəsində qeyri-sabit hava şəraiti hökm sürüb.
Böyük Qafqaz dağlarının cənub ətəyinin Zaqatala və Balakən rayonları ərazisindən keçən hissəsinə leysan yağışları yağıb. Nəticədə bölgənin iri çaylarından Talaçay, Katexçay, Balakən, Mazım, Silban və Mazıx çaylarında suyun səviyyəsi normadan artıb. Bölgəyə İki gün ərzində yağan leysan yağışları ən çox Balakən rayon ərazisinə düşüb. Leysan yağışları nəticəsində rayon ərazisindən axan Katex, Balakən, Mazımçay və İnter çaylarında suyun səviyyəsi normadan keçərək daşqınlar yaradıb.
Balakən rayon icra hakimiyyəti başçısının İtitala kəndi üzrə nümayəndəsi Gülüzar Qarayevanın verdiyi məlumata görə, Katex çayının daşması nəticəsində kənddə 250 evin həyətyanı sahəsi sel suları ilə dolub. 50 evin isə birinci mərtəbəsi sel suları ilə dolub, iki köhnə ev isə dağılıb, 50 evin divarlarında çat əmələ gəlib. Kənd qəbiristanlığı sel suları altında qalıb. Bundan başqa 480 yerlik məktəb binasının, uşaq bağçasının və poçt binasının həyətyanı sahəsi sel suları ilə dolub. Daşqın nəticəsində 150 hektar fındıq bağı, 600 hektar əkin-biçin sahəsi, 150 hektar örüş sahəsi sel suları altında qalıb, ümumilikdə 6 baş iri və xırda buynuzlu mal-qara, 1500 baş toyuq-cücə məhv olub.
Balakən RİH-dən verilən məlumata görə, daşqınlar nəticəsində Katex çayının kənarında ötən əsrin 60-cı illərində tikilmiş 100 metr qoruyucu bəndi dağılıb. İnter çayının məcrasından çıxması nəticəsində Şərif kəndi ərazisində 320-dək evin həyətyanı sahələrinə su dolub, sel iki körpünün dayaqlarını yuyub. Yeni Şərif kəndində də 100-dək, Qaysa, Xalatala və Meşəşambul kəndlərində hər birində 30-dək, Poçtbinə kəndində isə 15 evin həyətyanı sahələri, Meşəşambul kəndinin isə 700 hektara yaxın əkin sahəsi su altında qalıb. Hazırda Balakən rayon fövqəladə hallar komissiyasının üzvləri və yerli sakinlər daşqınların yaratdığı fəsadları aradan qaldırmaq istiqamətində iş aparırlar.
Seymur İsayev: "Heydər Əliyev milli dövlətçilik ənənələrinin bərpasında, möhkəmləndirilməsində və qorunmasında böyük xidmətlər göstərib"
Heydər Əliyevin anadan olmasının 101-ci ildönümüdür
İlham Əliyev və Mehriban Əliyeva Heydər Əliyevin məzarını ziyarət ediblər_thumb.jpg)
Leysan olacaq, dolu yağacaq
.jpg)
