Ronaldo futboldan getməyi düşünür

“Qızıl top”un beşqat sahibi, Səudiyyə Ərəbistanının “Əl-Nəsr” klubunun və Portuqaliya millisinin hücumçusu Kriştianu Ronaldo futboldan getməyə yaxındır. Yeniavaz.com xəbər verir ki, bu barədə “Teamtalk” portalı məlumat yayıb. Mənbənin məlumatına görə, 39 yaşlı forvard hazırda hadisələrin inkişafı üçün üç variantı nəzərdən keçirir. Portuqaliyalı “Əl-Nəsr”lə müqaviləsini uzada və Asiya Çempionlar Liqasını qazanmaq üçün komandanın gücləndirilməsini xahiş edə bilər. O, “Əl-Nəsr”lə müqaviləsi başa çatdıqdan sonra Portuqaliya klublarından biri ilə yekun müqavilə imzalamaq üçün vətəninə qayıtmaq variantını da istisna etmir. Onun üçüncü variantı isə peşəkar futbolçu karyerasını bitirməkdir. Ronaldonun əsas arzusu 2026-cı il dünya çempionatında milli komandada iştirak etməkdir, lakin “Əl-Nəsr” Çempionlar Liqasını qazansa, portuqaliyalı karyerasını daha erkən bitirə bilər. Qeyd edək ki, Səudiyyə Ərəbistanı klubunun heyətində Ronaldo 83 oyunda 74 qol vurub, 18 məhsuldar ötürmə edib. “Əl-Nəsr” 25 xalla Səudiyyə Ərəbistanı çempionatının turnir cədvəlində dördüncü yerdədir. Çempionata 36 xalla “Əl-İttihad” başçılıq edir.