LAÇININ İŞĞALINDAN 20 İL ÖTÜR

Daxili siyasi hərc-mərclik və xarici qüvvələr Azərbaycanı uduzdurdu

Bu gün Laçın rayonunun Ermənistan silahlı qüvvələri tərəfindən işğal olunmasından 20 il ötür. Ermənistan ordusu Şuşanın Turşsu kəndi və Ermənistanın Gorus rayonu istiqamətindən hücuma keçərək 1992-ci il, mayın 18-də Laçını işğal edib.

Azərbaycanın cənub-qərbində dağlıq ərazidə yerləşən Laçın rayonu şimaldan Kəlbəcər, şərqdən Şuşa, cənubdan Qubadlı, qərbdən isə Ermənistanla həmsərhəddir. Ərazisi 1835 kvadrat kilometr, əhalisi işğala qədər 64 min nəfər olub.
İşğal nəticəsində 1 şəhər, 1 qəsəbə və 120 kənd düşmən əlinə keçib, 264 nəfər şəhid olub, 65 nəfər girov götürülüb, 103 nəfər əlil olub. Rayon üzrə 1 yaşdan 16 yaşadək 24374 uşaqdan 18-i şəhid, 225 nəfəri əlil olub, 31-i hər iki valideynini itirib, 64 min nəfər məcburi köçkünə çevrilib.
Rayon ərazisindəki 133 iri və orta müəssisə, 20 tibb müəssisəsi, 217 mədəniyyət ocağı, 40-dək mədəni və tarixi abidə, onlarla təhsil müəssisəsi hazırda işğal altındadır.
Laçın alayının keçmiş komandanı Arif Paşanın sözlərinə görə, Laçının işğalının səbəblərini həmin dövrdəki siyasi hərc-mərclikdə axtarmaq lazımdır. Bundan başqa ordunun başında duranlar, xüsusilə də, zabit heyəti Rusiyanın təsiri altında idilər. Bu üzdən Laçının müdafiəsi qurula bilmədi. Düşmən torpaqlarımızı işğal etdi.