Məleykə Abbaszadə onların vəziyyətinə aydınlıq gətirdi

Simsar.az-ın məlumatına görə, bunu Tələbə Qəbulu üzrə Dövlət Komissiyasının sədri Məleykə Abbaszadə deyib. 

O bildirib ki, imtahana buraxılış vərəqələrini çap etdirməyən abituriyentlər harada, hansı məktəbdə, hansı şəhərdə imtahan verəcəklərini bilmirlər. M.Abbaszadə bu il ilk dəfə Gəncədə də III ixtisas qrupu üzrə imtahanların keçiriləcəyini xatırladıb. Eyni zamanda bu imtahanlar Bakı, Sumqayıt, Naxçıvan şəhərlərində keçirilir: “Tutaq ki, abituriyent Yevlaxda yaşayır və iyulun 3-də - imtahan verəcəyi gün TQDK-nın saytına daxil olaraq, imtahana buraxılış vərəqəsini götürür. Orada görür ki, onun imtahanı Bakı şəhərindəki binalardan birindədir. O halda abituriyent həmin gün imtahan zalına gələ bilməyəcək. Ona görə də abituriyentlər imtahana buraxılış vərəqələrini çap etdirib götürməyə tələsməlidirlər”.

TQDK sədri onu da qeyd edib ki, bəzi valideynlər, abituriyentlər belə məsələləri hansısa müəllimlərinə, yaxud ağıllı saydıqları adamlara həvalə edirlər: “Lakin vətəndaşların özləri informasiya-kommunikasiya texnologiyalarından istifadə etməyi bacarmalıdırlar və bu işləri özləri görməlidirlər”.