İran ərazisində Azərbaycan tərəfindən icarəyə götürülən 35 hektar ərazidə 4 terminalın tikintisi nəzərdə tutulur. Bunu “Azərbaycan Dəmir Yolları” QSC-nin Tarif şöbəsinin rəisi Elxan Əsədov deyib. Onun sözlərinə görə, bunların sırasında ümumi təyinatlı terminal, neft, taxıl və də konteynerlərin emalı terminalları olacaq.

"Hazırda İran istiqaməti üzrə yükdaşımalar həyata keçirilir. Söhbət əsasən ümumi təyinatlı yüklərdən gedir. Məsələn, Rusiyadan İrana və əks istiqamətə meşə materialları, metallurgiya məhsulları, taxıl və s. daşınır. Bir ay öncə isə Azərbaycan və İran dəmir yollarını birləşdirəcək "Rəşt-Astara" dəmir yolunun təməli qoyuldu", - deyə E. Əsədov bildirib.

“Azərbaycan Dəmir Yolları”nın rəsmisi onu da qeyd edib ki, QSC tərəfindən dəmir yollarının modernləşdirilməsi istiqamətində aparılan işlər çərçivəsində 3 100 vaqon alınıb və 50 alınacaq lokomotivdən 7-si artıq ölkəyə gətirilib.(ona)