Simsar. az xəbər verir ki, dünən Mahnı Teatrında görmə imkanları məhdud iki gəncin yaradıcılıq gecəsi keçirilib. Gecə millət vəkili Qənirə Paşayevanın rəhbərlik etdiyi "Avrasiya Beynəlxalq Araşdırmalar İnstitutu" İB və Arzu Bağırovanın rəhbərlik etdiyi "Regional Hüquqi və İqtisadi Maarifləndirmə" İB -nin və Arzu Bağırovanın dəstəyi ilə baş tutub. Könül dünyaları, mənəvi dünyaları zəngin olan 2 istedadlı gənc - Zeynəb və Fərqanın "Könül dünyası" adlı yaradıcılıq gecəsinə bir çox tanınmış insanlar da qatılıb. Bəstəkar Vaqif Gərayzadənin xüsusi dəstəyi ilə keçirilən gecədə əməkdar artist Nuriyyə Hüseynova, müğənni Elnarə və jurnalistlər də iştirak edib. Gecədə Zeynəb öz şeirlərini Fərqan isə mahnılarını təqdim edib. Gecəyə qatılan tamaşaçılar səbəbkarların çağırışlarına dəstək veriblər.