Gədəbəy rayonunun Ermənistanla Azərbaycan arasında ən son sərhəd kəndi olan Mutudərə sakinləri uzun müddətdir ki, işıq üzünə həsrətdir. Bu səbəbdən “Qafqazinfo”ya müraciət edən kənd sakinləri bildiriblər ki, kənd 1990-cı ildə Ermənilər tərəfindən 1 günlük işğal olunan zaman evlər yandırılıb. Daha sonra dövlət bütün evləri bərpa edib, kəndə yeni transformator quraşdırılıb. Ancaq kəndlilərin işıqlı günləri elə də uzun çəkməyib: “3 il əvvəl həmin transformator götürülüb yerinə köhnəsi qoyuldu. Ehtimal edirik ki, təzə transformatoru Gəncəyə aparıb satıblar. Əvəzində köhnə sınıq-salxaq transformator gətirilib. Əlaqədar orqanlara dəfələrlə müraciət etsək də, Mutudərəyə verilmiş və nömrəsinə kimi bilinən transformator geri qaytarılmır. Təmirdə olduğu deyilir. Necə olur ki, təmir 3 il müddətində bitmir? İşıq idarəsinə zəng vuranda deyirlər ki, qaçqınların borcu çoxdur. Ona görə düzəltmirik. Halbuki bu kəndin əhalisi üçün işıq pulsuzdur. Hər hansı bir borcumuz necə ola bilər?”

Sakinlər onu da bildirib ki, ərazidə yerləşən və "Pereval postu" kimi tanınan ən strateji posta da məhz həmin transformatordan işıq gedirdi. Hazırda orada da işıq yoxdur.  Məsələ ilə bağlı “Qafqazinfo”nun əməkdaşı Gədəbəy Elektrik Şəbəkəsinin rəisi Akif Əsgərovla əlaqə saxlayıb. Rəis bildirib ki, problem gələn həftəyə mütləq həll olunacaq: “Tranformator yandığı üçün Gəncəyə göndərmişik, orada yığılır. Təmir bitdikdən sonra uzağı həftənin 2-ci gününə kimi dəyişdiriləcək. Yeni transformatorun 3 il əvvəl götürülməsi məsələsinə gəldikdə isə, hadisə məndən qabaq olub. Nə dərəcədə doğru olub-olmadığını bilmirəm. Mən buraya 3 aydır ki, təyin olunmuşam”.