Azərbaycan Milli Elmlər Akademiyası (AMEA) Zoologiya İnstitutunun herpetologiya laboratoriyasının əməkdaşları Quba-Xaçmaz zonasının herpetofaunası üzrə tədqiqatlar aparıblar. Araşdırmalar nəticəsində Azərbaycanda Böyük Qafqazın yüksək dağlıq əraziləri üçün yeni Gürzələr fəsiləsinə aid olan ilan növü (Pelias lotiyevi – Lotiyev başıqalxanlısı) aşkar edilib.

Simsar.az xəbər verir ki, bu növün dünya üzrə arealı Şimali Qafqaz regionudur və Böyük Qafqazın şimal yamacları boyu (Soçi şəhəri ətrafı) ərazilərindən Dağıstan-Azərbaycan sərhədinə qədər uzanan kserofit dağlıq ərazilərini  əhatə edir. Əldə edilən tapıntı Gürzələr (Viperida) fəsiləsindən olan Lotiyev başı qalxanlısının Azərbaycanda Böyük Qafqazın şimal yamaclarında yayıldığını sübut edir.

Hələlik bu növə Azərbaycanda yalnız Quba rayonu hüdudunda dəniz səviyyəsindən 1900-2300 metr hündürlükdə yerləşən subalp dağlıq ərazilərində (Xınalıq kəndi ətrafı) rast gəlinib. Hazırda növün vertikal və horizontal istiqamətlərdə yayılmasının öyrənilməsi planlaşdırılır.