Bakı Baş Gömrük İdarəsinin əməkdaşlarından biri 4 ayda 20 min manat pul qazanıb

Azərbaycanın gömrük sistemində qaçaqmalçılıq hallarının qarşısını alan gömrük işçiləri mükafat şəklində böyük məbləğdə pul qazanırlar.
Bunu jurnalistlərə açıqlamasında Dövlət Gömrük Komitəsinin sədri Aydın Əliyev bildirib. Simsar.az-ın məlumatına görə, komitə sdəri deyib ki, hələ 1990-cı illərdən qüvvədə olan qaydalara əsasən, gömrük işçiləri tərəfindən aşkar edilən qaçaq malın müsadirəsi və satışından əldə olunan vəsaitin 1,75%-i pozuntunu aşkar edən gömrük əməkdaşına çatır: «Əgər pozuntunu bir neçə əməkdaş aşkar edibsə, onların hər biri 1,75%-lik mükafat alır».
Bu qaydalar əsasında bir qədər əvvəl Bakı Baş Gömrük İdarəsinin əməkdaşlarından biri bu ilin ilk 4 ayı ərzində 20 min manat pul qazanıb: «Buna səbəb onun aşkar etdiyi qaçaqmal və cərimələrdir».
Komitə sədrinin sözlərinə görə, bu qayda gömrük işçilərinin daha ciddi işi üçün mühüm stimul rolu oynayır.