Xalq qəhrəmanına qoyulacaq abidənin yeri müəyyənləşib

Azərbaycanın əfsanəvi xalq qəhrəmanı Koroğluya qoyulacaq abidənin yeri müəyyənləşib. Mədəniyyət və Turizm Nazirliyinin Təsviri və dekorativ sənət şöbəsinin əməkdaşı Qalib Qasımov Simsar.az-a verdiyi məlumata görə, Koroğluya heykəl Azadlıq prospekri, "Dostluq" kinoteatrının yanındakı keçmiş Çaparidze bağında qoyulacaq.  
Artıq parkın ətrafı hasara alınıb, heykəlin qoyulması ilə bağlı müəyyən işlər aparılır.
Prezidenti İlham Əliyev 2009-cu il dekabrın 3-də Koroğluya Bakıda abidə qoyulması haqda sərəncam imzalayıb.
Sərəncamda bildirilir ki, xalq qəhrəmanı Koroğlu milli-mənəvi dəyərlərin daşıyıcısına çevrilərək əsrlərdən bəri insanlarımızın yaddaşına vətənpərvərliyin və mübarizliyin rəmzi kimi həkk olunub. Buna görə də Bakı şəhərində xalq qəhrəmanı Koroğlunun abidəsinin ucaldılması üçün Azərbaycan Respublikasının 2010-cu il dövlət büdcəsində nəzərdə tutulmuş Azərbaycan Respublikası Prezidentinin Ehtiyat Fondundan Bakı Şəhər İcra Hakimiyyətinə 5 (beş) milyon manat məbləğində vəsait ayrılıb.

RAMİL