“Heyvanlar arasında “Nodulyar dermatit” virusuna yoluxma halına iki həftədən çoxdur rast gəlinmir”.

Bunu Simsar.az-a açıqlamasında Kənd Təsərrüfatı Nazirliyi yanında Dövlət Baytarlıq Xidmətinin mətbuat mərkəzinin rəhbəri Yolçu Xanvəli deyib.

Onun sözlərinə görə, Azərbaycanda havaların kəskin soyması ilə əlaqədar iribuynuzlu heyvanlar arasında yayılan "Nodulyar dermatit” virus xəstəliyinə yoluxan heyvanların sayı azalıb: “Hazırda cəmi 100 baş iribuynuzlu heyvan müalicə altındadır. Onların da yaxın günlərdə tamamilə sağalacağı güman edilir.

Xəstəlik baş qaldıran gündən indiyədək bu virusa 5178 heyvan yoluxub. Onlardan 4497 iribuynuzlu müalicə olunub, 255 baş isə  tələf olub. Hazırda xəstə olan heyvanların sayı 100-dür.

Y. Xanvəli xəstəliyin qarşısının alınması üçün profilaktik tədbirlərin davam etdirildiyini də deyib.

Aysel Kərimova