Üçüncü intelektual yarışmaya start verildi

Bu gün Gənclər Təşkilatları Milli Şurası (ARGTMŞ) Gənclər və İdman Nazirliyi ilə birgə “Park İnn” otelində “Bakının Birincisi” adlı II İntellektual Gənclər Festivalı çərçivəsində “Nə? Harada? Nə zaman?” İntellektual yarışması keçirib.

Simsar.az-ın məlumatına görə, 30 komandada birləşən 180 nəfərin iştirakı ilə keçiriləcək yarışda tələbələr, bilicilər klublarının nümayəndələri iştirak edəcəklər.

Sözügedən layihə “Firstline” assistance “ və “Park İnn”-in sponsorluğu ilə reallaşdırılır. Sual paketi Beynəlxalq Bilicilər Hərəkatının ən yaxşı redaktoru seçilmiş Konstantin Naumenko tərəfindən hazırlanıb.

Açılış mərasimində çıxış edən Milli Şuranın sədri, millət vəkili Fuad Muradov bildirib ki, Prezident İlham Əliyevin imzaladığı “Azərbaycan gəncliyi 2011-2015-ci illərdə” Dövlət Proqramı haqqında sərəncamı bir daha dövlətin gənclər siyasətinə olan diqqət və qayğısını ifadə edir. F. Muradov bu tədbirin keçirilməsində əsas məqsəd gənclərin intellektual səviyyəsinin artırılması, bilik və bacarıqlarının daha geniş şəkildə ortaya qoyulmasıdır.

Daha sonra yarışmaya start verilib. Turniri Minsk şəhərindən dəvət olunmuş məşhur teleaparıcı, “Xrustal bayquş” mükafatının sahibi, “2001-2005-ci illərdə klubun ən yaxşı kapitanı” fəxri adına layiq görülmüş Ales Muxin aparıb. Turnirin münsiflər heyəti Bakı elitar klubunun üzvləri olacaq.

Milli Şura son 2 il ərzində “Nə? Harada? Nə zaman?” oyunu üzrə artıq 3-cü layihəsini həyata keçirir.