Bu gün Bakı Ağır Cinayətlər Məhkəməsində Sumqayıt şəhərində xəvaricilərlə sələfilər arasında baş vermiş silahlı münaqişə ilə əlaqədar həbs edilmiş şəxslərin cinayət işi üzrə məhkəmə prosesi davam etdirilib.

APA-nın məlumatına görə, hakim Səbuhi Hüseynovun sədrliyi ilə keçirilən prosesdə  2 zərərçəkmiş və ona yaxın şahid ifadə verib. Onlar ibtidai istintaq zamanı verdikləri ifadəni təsdiq etdiklərini deyiblər.

Proses noyabrın 11-də davam etdiriləcək.

Qeyd edək ki, ötən il dekabrın 11-də Sumqayıtda xəvaricilərlə sələfilər arasında dini zəmində baş vermiş silahlı münaqişə nəticəsində şəhər sakinlərindən Anar Rəhimov və Elmar Məmmədli bıçaq xəsarətləri, Təzə Corat qəsəbəsinin sakinləri Elşən Musayev və Elnur Nəzərəliyev isə qəlpə yaraları alıblar.

Polis və prokurorluq orqanları əməkdaşlarının həyata keçirdikləri istintaq hərəkətləri və əməliyyat-axtarış tədbirləri nəticəsində hadisədə təqsirli bilinən Murad Məhərrəmov, Kənan Mehrəliyev, Elçin Əkbərov, Amil Tağıyev, Əhməd Salmanov, Anar Mirzəyev, Zaur Paşayev, Elman Məmmədli, Anar Rəhimov, Firudin Musayev, Vüqar Abdullayev, Elçin Mirzəyev, Cəlal Mikayılov və digər 3 nəfər həbs edilib. Adları qeyd olunan 13 nəfərin cinayət işi ayrıca icraata verilib.

Keçirilmiş baxış zamanı Əhməd Salmanovun evindən 110 qram həşiş, 5 kiloqram civəyə oxşar maddə, qanunla qadağan olunmuş 44 ədəd müxtəlif məzmunlu dini ədəbiyyat və 30 disk, Kənan Mehrəliyevin evindən isə 1 ədəd “F-1” qumbarası, 1 qumbara alışqanı, 123 ədəd avtomat patronu, qanunla qadağan olunmuş 30 ədəd müxtəlif məzmunlu dini ədəbiyyat və 30 disk aşkar edilərək götürülüb.

R. Musayevin baş və bədəninin müxtəlif nahiyələrində bıçaq xəsarətlərinin olması aşkar edilib.