Rusiya Federasiyası Qazaxıstan sərhədlərinin yaxınlığında strateji təyinatlı qüvvələrin irimiqyaslı hərbi təlimlərinə başlayır.

Simsar.az inforesist.org-a istinadla xəbər verir ki, bu barədə Rusiyanın strateji təyinatlı raket qoşunlarının komandanlığının rəsmisi Dmitri Andreyev bildirib.

Təlimlərə zirehli texnika və aviasiyanın təxminən 400 vahidi, eyni zamanda 4 mindən artıq canlı qüvvə cəlb ediləcək. Komanda-qərargah təlimlərində hərbçilər “diversantlara qarşı hərəkət və yüksək dəqiqlikli silahlarla zərbə”ni sınaqdan keçirəcəklər.

Hərbi ekspertlər isə Qazaxıstan sərhədlərində keçiriləcək təlimlərin yeri və vaxtının təsadüfən seçilmədiyini bildirirlər. Hərbi təlimlərlə bağlı Rusiya Müdafiə Nazirliyindən bəyanatın verildiyi bir vaxtda NATO-nun Çexiyada irimiqyaslı təlimləri başlanır. Sabah isə Uelsdə NATO-nun iki gün davam edəcək sammiti başlanır. Sammitdə hərbi alyansın Rusiyaya qarşı fəaliyyət planının qəbulu gözlənilir.

ABŞ prezidenti sammitdən əvvəl Baltikyanı ölkələrə, yəni Rusiyanın sərhədlərinə gələrək Moskvaya önəmli mesajlar göndərib.

Hüseyn İbadlı