Terror təşkilatı İŞİD-in Suriyanın Rakka şəhərində Tabaka hərbi hava limanını ələ keçirməsindən sonra, bölgədən dəhşətli xəbərlər gəlir.

İŞİD tərəfdarlarının sosial mediada paylaşdığı son görüntülərdə, Tabaka hava limanından qaçan onlarla Suriya əsgərinin militanlar tərəfindən əsir alınaraq səhralıqda yeridildiyi görülür. Simsar.az Associated Press-ə istinadən məlumat verir ki, görüntülərdəki militanların “qoyun otaran çobanlar kimi səs çıxardığı”, yəni əsirlərə heyvan kimi davranıldığı bildirilib.

Suriya İnsan Haqqları Təşkilatı Direktoru Rami Əbdülrəhman, alt paltarlarına qədər soyundurulan əsgərlərin, İŞİD silahlıları tərəfindən edam edildiyini bildirib.

İŞİD-ə yaxın qaynaqların məlumatına görə, İŞİD militanları, Tabaka hərbi hava limanını ələ keçirdikləri zaman, qaçaraq gizlənən 200-ə yaxın rejim əsgəri ələ keçirilərək öldürülüb. Təxminən 250 əsgər isə əsir alınıb.