Lənkəranda zəncirvari yol-nəqliyyat qəzası baş verib.

APA-nın cənub bürosunun məlumatına görə, hadisə bu gün saat 14.00 radələrində Ələt-Astara magistralının 205-ci kilometrliyində, yolun rayonun Gərmətük qəsəbəsindən keçən hissəsində qeydə alınıb.

Lənkəran rayon sakinləri - 23 yaşlı Elçin Vəlizadənin idarə etdiyi “VAZ-2107”, 20 yaşlı Rahim İsmayılzadənin idarə etdiyi “VAZ-2106” və 31 yaşlı Teymur Əzimovun idarə etdiyi “Mersedes” markalı minik avtomobilləri toqquşaraq zəncirvari qəza törədiblər.

Xoşbəxtlikdən qəza zamanı sürücü və sərnişinlərdən ciddi xəsarət alan olmasa da, hər 3 avtomaşın yararsız hala düşüb.

İlkin versiya kimi qəzanın “VAZ-2107”-nin sürücüsünün düzgün manevr etməməsi səbəbindən törədildiyi bildirilir.

Faktla bağlı Daxili İşlər Nazirliyinin Baş Dövlət Yol Polisi İdarəsinin İstintaq və Təhqiqat Şöbəsində araşdırma aparılır.