Müxalifət isə “Fəvvarələr meydanı” -nı hədəf seçib

İctimai Palatanın (İP) aprelin 2-nə təyin etdiyi aksiya ilə bağlı Bakı Şəhər İcra Hakimiyyətinə (BŞİH) göndərilmiş müraciət məktubuna cavab verilib.

Bu barədə APA-ya İP-ə daxil olan Müsavat Partiyası başqanının müavini Tofiq Yaqublu məlumat verib.

O bildirib ki, BŞİH “Nərimanov” kinoteatrının qarşısındakı meydanda kütləvi etiraz aksiyası keçirməyə razılıq verməyib. Əvəzində aksiyanın Bibiheybət qəsəbəsindəki stadionda keçirilməsi təklif edilib.

Müsavat partiyası başqanının müavini Arif Hacılı isə APA-ya bildirib ki, onlar aksiyanı “Fəvvarələr meydanı”nda keçirəcəklər: “İctimai Palata olaraq mitinqi aprelin 2-si saat 14.00-da “Fəvvarələr meydanı”nda keçirəcəyik”.

Qeyd edək ki, İP adından Müsavat Partiyası, AXCP, KXCP və AMİP nümayəndələrinin imza ataraq BŞİH-ə göndərdikləri müraciətdə demokratik islahatlar aparılması, söz azadlığının təmin edilməsi, növbədənkənar parlament seçkilərinin keçirilməsi, Qarabağa azadlıq və s. şüarları ilə “Nərimanov” kinoteatrının qarşısındakı meydanda kütləvi etiraz aksiyasının keçiriləcəyi bildirilib.