“Microsoft” Korporasiyası “OneDrive” servisinin yenilənməsini elan edib. Simsar.az-ın məlumatına görə yenilənmə çərçivəsində istifadəçilərə təqdim olunan pulsuz servisin həcmi  genişləndiriləcək, pullu servisin qiyməti aşağı salınacaq, “Office 365”-in abunəçiləri isə əlavə imkanlar əldə edəcək.

İndi “OneDrive”da pulsuz olaraq əvvəlki kimi 7 Qb deyil, 15 Qb-dək məlumatı saxlamaq mümkün olacaq.

“Office 365” abunəçiləri üçün “OneDrive” servisindəki saxlanma yeri 1 Tb-dək artırılacaq.

Onun istifadə qiyməti aşağıdakı kimi olacaq:

Şəxsi “Office 365” üçün ayda 6,99 dollar

Ev üçün “Office 365”– ayda 9,99 dollar (5 istifadəçiyədək, saxlanma yerinin ümumi həcmi 5 Tb)

Tələbələr üçün “Office 365” – 4 il üçün 79,99 dollar

Pullu saxlanma yerinin qiyməti bütün dünyada azalacaq və aşağıdakı kimi təşkil edəcək:

100 Qb üçün ayda 1,99 dollar.

Sözügedən servisdən yararlanmaq üçün dostlarını dəvət edən “OneDrive” istifadəçiləri əvvəlki kimi 55 Qb-dək pulsuz saxlanma yeri əldə edəcək (hər dəvətə görə 500 Mb). Bundan başqa, istənilən qurğuda fotoşəklin “bulud”a yüklənməsinin avtomatik aktivləndirmə funksiyasından sonra “OneDrive” əlavə 3 Qb təqdim edir.

Xatırladaq ki, “OneDrive” internet-hostinq sənədlər, fotoşəkillər, videolar və digər faylları “bulud”da saxlamaq və istənilən qurğuda onları açmaq imkanını yaradır. Bütün son yeniliklərdən yaxın həftələr ərzində istifadə etmək mümkün olacaq.

Vüsal Qarayev