Prezidentlər Soçi görüşü ilə bağlı birgə bəyanat qəbul ediblər

Rusiya, Ermənistan və Azərbaycan prezidentləri bu gün Soçidə keçirilən üçtərəfli görüşdə Dağlıq Qarabağ münaqişəsinin nizamlanmasına dair apardıqları danışıqların yekunları ilə bağlı birgə bəyanat qəbul ediblər. APA-nın “RİA Novosti”yə istinadən verdiyi xəbərə görə, sənəddə qeyd olunur ki, dövlət başçıları ötən ilin oktyabrın 27-də Həştərxanda qəbul olunmuş üçtərəfli bəyanatın praktiki icrası məsələlərini müzakirə ediblər. Belə ki, prezidentlər qısa müddət ərzində hərbi əsirlərin dəyişdirilməsi prosesinin başa çatdırılmasına dair razılığa gəliblər. 

Bununla yanaşı, Soçi bəyanatında vurğulanır ki, tərəflər bütün mübahisəli məsələlərin sülh yolu ilə həlli və təmas xəttində baş verə biləcək mümkün insidentlərin ATƏT-in Minsk Qrupunun egidası altında və ATƏT sədrinin xüsusi nümayəndəsinin dəstəyi ilə araşdırılmasının tərəfdarıdır.

”Prezidentlər Dağlıq Qarabağ nizamlanması məsələləri üzrə öz mütəmadi görüşlərinin əhəmiyyətinin vacibliyini vurğulayıblar və bunun ATƏT-in Minsk Qrupunun həmsədrlərinin apardığı işə əlavə olaraq bu formatda davam etdirilməsinə dair razılığa gəliblər” - deyə, bəyanatda bildirilir.