Alyans daxilində ciddi fikir ayrılığı var.

NATO hələ Liviyada hərbi əməliyyat keçirməyə hazır deyil. Lent.az-ın “İTAR-TASS” agentliyinə istinadən verdiyi məlumata görə, Brüsseldəki diplomatik mənbə bildirib ki, NATO-nun Şimali Afrikadakı vəziyyətlə bağlı iclasının yekunu belə olub.

Qeyd olunub ki, NATO diqqətlə hadisələri izləyir və Liviya lideri Müəmmər Qəddafiyə qarşı hərbi əməliyyatdan söhbət getmir.

Ancaq Şimali Atlantika Alyansının toplantısının yekunları ilə bağlı rəsmi açıqlama verilməyib. Alyansın daxilində Liviyaya müdaxilə məsələsində fikir ayrılığı var. ABŞ və Böyük Britaniyadan fərqli olaraq, Avropa ölkələrinin əksəriyyəti NATO-nun bu problemin həllinə müdaxilə etməsinə qarşı çıxır. Liviyanın özündə də tərəflər xarici müdaxiləyə qarşı çıxırlar.

Bu arada BMT-nin Beynəlxalq Cinayət Məhkəməsi Liviyada zorakılıqla bağlı araşdırmaya başlayıb.