Azərbaycanda artıq qadın boksu üzrə milli komanda formalaşdırılır.

Siasport.az saytı xəbər verir ki, fevralın 5-də fəaliyyətə başlayan komanda hazırda Dağıstanın İzberbaş şəhərində təlim-məşq toplanışındadır. Heyətdə 4 idmançı - Əzizə Abbasova, Fatma Urusova (hər ikisi 51 kq), Leyla Hacıyeva (60 kq) və Yelena Vıstropol (75 kq) yer alır. Təlim-məşq toplanışının martın 15-dək davam edəcəyi bildirilir.

Daha sonra isə Lənkəranda da toplanış olacaq və orada komandaya yeni istedadlı gənclər də qoşulacaq. Rusiyalı mütəxəssis Aleksandr Denisovun rəhbərlik etdiyi komandanın ilk yarışı Çexiyada təşkil olunacaq turnirdir. Komandanın lisenziya xarakterli yarışlarda iştirak etməsi nəzərdə tutulur.