Misir prezidenti Hüsnü Mübarək müalicə üçün Almaniyaya getmək fikrində deyil. Bu barədə “Welt” Misirin vitse-prezidenti Ömər Süleymanın bəyanatına istinadən xəbər verib.

“Biz Almaniyadan gələn təklifə görə, minnətdarıq, lakin prezidentin müalicəyə ehtiyacı yoxdur”, - deyə Süleyman qeyd edib.

Əvvəllər KİV-də məlumat verilmişdi ki, 82 yaşlı Hüsnü Mübarək müalicə üçün Almaniyanın klinikalarından birinə getməyə hazırdır. Bu yolla o, hakimiyyətdən getməsini bildirmək istəyib. Prezidentin istefasını Misirin şəhərlərində üç həftə kütləvi etiraz aksiyaları keçirən müxalifət tələb edir.

“Spiegel”in səhiyyə dairələrində bəzi naməlum mənbələrə istinadən verdiyi xəbərə görə, Misir tərəfi artıq Mübarəkin müalicəsi ilə bağlı Almaniyanın bəzi klinikaları ilə danışıqlara başlayıb.

İlk növbədə söhbət Baden-Vürtemberqdəki Maks Qrundiqin klinikasından gedir. SalamNews-un “lenta.ru”ya istinadən verdiyi xəbərə görə, bu səhiyyə idarəsinin saytında yüksək səviyyəli tibbi xidmətlər və öz müştərilərinə comfort və beşulduzlu mehmanxana səviyyəsində yüksək səviyyəli xidmət təklif edir.