Bu gün Tehranda Azərbaycan, İran və Rusiyanın dəmiryol qurumlarının rəhbərləri “Şimal-Cənub” layihəsi çərçivəsində saziş paketi imzalayıblar.

Bu barədə SalamNews “IribNews”a istinadən xəbər verir. Üçtərəfli danışıqların son günü İran və Rusiya administrasiyaları “Tehran-Bəndər-Abbas” dəmiryolunun elektrikləşdirilmiş sahəsinin istismarı üzrə texniki əməkdaşlıq sazişi bağlayıblar.

İran və Azərbaycan təmsilçiləri arasında dəmiryolu xətlərinin inkişaf etdirilməsi barədə sənəd imzalanıb.

Görüşün gedişində planlaşdırma məsələləri, xüsusilə də “Şimal-Cənub” dəhlizinin bir hissəsi olan “Qəzvin-Rəşt-Astara (İran) – Astara (Azərbaycan)” dəmiryolunun inşaat və istismar məsələsi müzakirə edilib.

Bu layihədə İranın cənub vilayəti olan Hormozqandan başlayaraq İran, Azərbaycan və Rusiya ərazisindən keçməklə Avropaya qədər ərazilərin əhatə edilməsi nəzərdə tutulur.