.

Bu il 11-cisi keçirilən “Beynəlxalq Türkcə Olimpiadaları” start götürüb. Simsar.az-ın İstanbula ezam olunmuş nümayəndəsi Elmar Hüseynovun verdiyi xəbərə görə, “Dünyəvi sülh uğrunda” (Evrensel barışa doğru) şüarı altında mayın 24-də başlayan olimpiadaya 140 ölkədən iki min şagird qatılıb. Kültürparkdakı sərgidə qonaqlar nümayiş etdirdikləri müxtəlif bacarıqlarla öz ölkələrini türk dilində ifadə edəcəklər.
“Türkcə Olimpiadaları” ilk dəfə 2003-cü ildə 17 ölkənin iştirakı ilə gerçəkləşib. Hər il İstanbul və Ankarada keçirilən şənliklərin “EXPO 2020-ə” namizədliklə əlaqədar olaraq İzmirdə keçirilməsinə qərar verilib.
Təşkilatçılığın yüksək səviyyədə olduğu şənliklərdə hər ölkə iştirakçılarının zövqünə uyğun 20 min yemək təqdim olunacaq. Təşkilatçılar olimpiyadaya qatılan uşaqların Türkiyədəki türklərdən daha yaxşı türkcə danışdıqlarını bildiriblər.
Qeyd edək ki, İzmirdə keçirilən şöləndə Azərbaycanın aparıcı KİV-lərindən 50-dək jurnalist iştirak edəcək. Jurnalistlər bu gün Sabiha Gökçen hava limanından İzmirə yola düşüblər. Sabah isə yenidən İstanbula qayıdacaqlar.

Elmar Hüseynov
İstanbul