Qrant müqavilələrinin ümumi məbləği ümumi məbləği müxtəlif valyutalarda olmaqla 2,62 milyon dollar, 1,03 milyon manat və 14,64 min avro təşkil edib

Azərbaycan prezidentinin 2004-cü il 12 fevral tarixli Fərmanı ilə təsdiq edilmiş "Qrant alınmasına (verilməsinə) dair müqavilələrin (qərarların) qeydiyyata alınması Qaydaları"na müvafiq olaraq, kommersiya hüquqi şəxslərin müraciətləri əsasında İqtisadi İnkişaf Nazirliyi tərəfindən 2011-ci il ərzində 12 kommersiya hüquqi şəxsin 29 qrant müqaviləsi (qərarı) qeydiyyata alınıb. Nazirliyin mətbuat xidmətindən ANS PRESS-ə verilən məlumata görə, qeydiyyata alınmış qrant müqavilələrinin (qərarlarının) ümumi məbləği müxtəlif valyutalarda olmaqla 2,62 milyon dollar, 1,03 milyon manat və 14,64 min avro təşkil edib.

Qrant vəsaitləri poeziya və atalar sözlərinin tərcüməsinə, dilçilik və mədəniyyət məlumatlarının toplanmasına, lüğətlərin hazırlanması və seminarların keçirilməsinə, kiçik və orta sahibkarlığın inkişafına, kənd təsərrüfatının inkişafı və bu sahədə məşğulluğun artırılmasına, məcburi köçkünləri, qaçqınları və aztəminatlı əhalini sahibkarlıq fəaliyyətinə cəlb etməklə məşğulluğun yüksəldilməsinə və s. istiqamətlərə yönəldilib.