Azərbaycan parlamentində "Yol hərəkəti haqqında" qanuna mümkün dəyişikliklər müzakirə olunur

Day.Az saytının verdiyi məlumata görə, dəyişikliklər zamanı sürücülük vəsiqəsi almaq istəyən şəxslərin sürücülük məktəbinə getmək öhdəliyi ləğv oluna bilər.

Millət vəkili Çingiz Qənizadə "Azerbaydjanskiye İzvestiya"ya müsahibəsində bildirib ki, yeni qanunda vətəndaşa azad seçimin verilməsi nəzərdə tutur: "Vətəndaş sürücülük məktəbinə getməyi, yoxsa imtahana sərbəst şəkildə hazırlaşmağı özü seçməlidir. Dəyişikliyə əsasən, sürücülük vəsiqəsi almaq istəyənlər imtahana buraxılmaları üçün sürücülük məktəbindən keçməli olmayacaqlar. Parlamentin növbəti iclaslarından birində bu məsələnin müzakirəyə çıxarılması gözlənilir. Guman ki, bu məsələdə deputatlar arasında ciddi fikir ayrılığı olmayacaq".

Millət vəkili bildirib ki, sürücülük məktəblərində oxumaq çoxdan formal xarakter alıb və bundan sui-istifadə olunur.

Ç.Qənizadə yeni qanunun qəbulundan sonra sürücülük məktəblərinin bir hissəsinin fəaliyyətini dayandıracağını düşünür: "İndi demək olar ki, hər küncdə belə məktəblərə rast gəlinir. Gələcəkdə onlara indiki qədər təlabat olmayacaq və müvafiq olaraq onların sayı real təlabata əsaslanacaq".